India është duke u përballur me një valë të të nxehtit. Temperaturat në shumë pjesë të këtij shteti kanë shkuar në mbi 45 gradë. Përndryshe, temperatura në rajonin e Rajasthanit të dielën shkoi në 50.8 gratë. Lajmin e bëri të ditur departamenti i meteorologjisë.

Për shkak të temperaturave shumë të larta, rajoni i Pradeshit e ka shpallur rrezikun e kushteve të nxehtësisë së madhe. Të dyja këto shtete dallohen për temperatura të larta gjatë verës. Sidoqoftë, ky vit ka qenë i rëndë në këtë aspekt edhe për pjesët tjera të Indisë.

Temperaturat e larta i kanë goditur më së shumti personat e pastrehë dhe ata që janë të detyruar të punojnë në mjedis të hapur, siç janë shitësit e rrugës, policët e trafikut dhe vozitësit e karrocave. Në mesin e njerëzve të goditur nga vapa janë edhe shpërndarësit e ushqimit të restoranteve.

Së paku shtatë qytete dhe qyteza indiane janë në listën e 15 vendeve më të nxehta në botë. Tetë vendet tjera janë në Pakistan, ku Jacobabadi me temperaturë prej 51 gradësh po cilësohet si vendi më i nxehtë në botë.

Departamenti indian i meteorologjisë ka njoftuar se vala e të nxehtit ka gjasa të mbretërojë edhe në ditët e ardhshme. Disa vullnetarë kanë dalë në rrugë për të shpërndarë ujë dhe pije tjera të ftohta falas në semaforë dhe nëpër trotuare, shkruan “BBC”, transmeton Gazeta Express.